Kipa mpya wa Yanga, Juma Kaseja.KIPA mpya wa Yanga, Juma Kaseja, amesema yupo tayari muda na wakati wowote kucheza mechi dhidi ya timu yake ya zamani, Simba.
Kaseja ametoa kauli hiyo juzi Jumamosi mara baada ya kumalizika kwa mchezo wa kirafiki dhidi ya KMKM ya Zanzibar kwa ajili ya kujiandaa na mechi ya Mtani Jembe itakayowakutanisha Simba na Yanga kwenye Uwanja wa Taifa, Dar es Salaam, Jumamosi ijayo.
Akizungumza na Championi Jumatatu, Kaseja alisema ana uzoefu mkubwa wa kucheza mechi kati ya timu hizo mbili.
Kaseja alisema mechi hiyo haihofii na yupo fiti kwa ajili ya kukabiliana na Simba kutokana na maandalizi anayoyafanya chini ya kocha wake Mkenya, Razack Siwa.
“Nina uzoefu mkubwa wa kucheza mechi hizi ngumu za Simba na Yanga mara zinapokutana, hivyo sihofii kabisa, nipo tayari kucheza muda wowote.
“Kwa bahati nzuri nimewahi kuzichezea timu hizo zote kwa wakati tofauti, hivyo nazijua vizuri, kikubwa ninaendelea na maandalizi ya nguvu kuhakikisha ninafanya vizuri,” alisema Kaseja.
credit Champion
