 |
| KUTOKA KUSHOTO: Winnie Mandela, Jaji Dikgang Moseneke na Mzee Mandela. |
Mke wa zamani wa Nelson Mandela, Winnie
Madikizela-Mandela ameambulia patupu katika wosia wa kinara huyo wa vita
dhidi ya ubaguzi wa rangi, imebainika.
Rais huyo wa zamani wa Afrika Kusini
amegawanya mali zake zenye thamani ya Pauni za Uingereza milioni 2.5
kati ya wanafamilia yake, wafanyakazi na chama tawala cha African
National Congress.
Hatahivyo, ameamua kutompatia chochote Winnie - mke wake wa pili, ambaye alizaa naye watoto wawili, Zenani na Zindziswa.
Wakati huohuo, mke wake wa tatu, Graca
Machel, ametajwa kama mrithi mkuu wa wosia huo sababu ndoa yao ilikuwa
'kwenye mali ya jamii', kwa mujibu wa msimamizi wa mirathi, Naibu Jaji
Mkuu Dikgang Moseneke.
Hivyo amethibitishwa kupata asilimia 50 ya
mali zake, ambayo imethaminishwa kufikia Randi milioni 46 (sawa na Pauni
za Uingereza 2.5), bila kuhusisha mirabaha.
Wosia huo wa Mandela wenye kurasa 40 -
ulioandikwa mwaka 2004, na kufanyiwa maboresho mwaka 2005 na 2008 -
ulisomwa mjini Johannesburg jana asubuhi.
Mgawanyo huo wa mali zake ulitarajiwa kuibua mgogoro mkubwa miongozi mwa watoto zake 30, wajukuu na vitukuu.
Lakini inaaminika kuwa umekubalika na familia yake bila pingamizi lolote mpaka sasa.
Kama mrithi mkuu, Mama Graca lazima adai
nusu yake ya utajiri huo ndani ya siku 90, alisema Moseneke, ambaye
aliungana na wasimamizi wa mirathi George Bizos, mwanasheria wa haki za
binadamu ambaye alikuwa rafiki wa siku nyingi wa Mandela, na Themba
Sangoni, jaji mkuu kutoka jimbo la Eastern Cape.
Aliongeza kwamba ingawa Winnie hakuwa
ametajwa katika wosia huo, wajukuu zake kila mmoja atapata Dola za
Marekani 9,000 (sawa na Pauni za Uingereza 5,500).
Moneseke alisema usomwaji wa wosia huo kwa
ndugu wa Mandela 'ulienda vizuri' - lakini aliongeza 'kulihitajika
ufafanuzi mara kwa mara'.
Utajiri wa shujaa huyo wa mapambano dhidi
ya ubaguzi wa rangi umegawanywa kati ya taasisi tatu alizoanzisha,
ikiwamo moja iliyoundwa kwa ajili ya kuhudumia ndugu wa familia yake,
alisema.
Mandela, mfungwa wakati wa utawala dhalimu
wa weupe wachache ambaye alikuja kuwa rais wa kwanza mweusi wa Afrika
Kusini, alifariki Desemba 5 akiwa na umri wa miaka 95 - na kufuatiwa na
kipindi cha siku 10 za maombolezo nchi nzima na kufurika salamu za
rambirambi kutoka kote duniani.
Ameacha mali ambazo zinahusisha jumba la
thamani kubwa mjini Johannesburg na nyumba ya wastani ya makazi kwenye
kijiji chake alikozaliwa katika jimbo la Eastern Cape.
Pia unahusisha mrabaha kutoka mauzo ya vitabu, vikiwamo 'Mandela's autobiography' na 'Long Walk to Freedom'.
MUHTASARI WA WARITHI WALIOTAJWA KATIKA WOSIA WA MANDELA:
Takribani watu 50 au taasisi zimetajwa kama warithi kwenye wosia wa Nelson Mandela, kwa mujibu wa muhtasari maalumu.
Warithi wakuu ni:
- Mke Graca Machel, ambaye
amekabidhiwa asilimia 50 ya utajiri wake, wenye thamani ya takribani
Dola za Marekani milioni 4.1. Anatarajiwa kupata haki hiyo kwa kupokea
vitegauchumi vinne nchini Msumbiji, magari, michoro, vito na mali
nyinginezo.
- Watoto wa Mandela kila mmoja
atapata takribani Dola za Marekani 300,000, au kama waliwahi kukopa
kiasi hicho kutoka kwake wakati wa uhai wake, deni lao litafutwa.
- Watoto wa Graca, Josina Machel na Malengane Machel, kila mmoja atapata takribani Dola za Marekani 270,000.
- Wajukuu wanne wa Mandela kwa
marehemu mtoto wake wa kiume Makgatho kila mmoja atapata 300,000 na
wameruhusiwa kutumia nyumba yake iliyoko Houghton, Johannesburg.
- Chama cha ANC, kitapata kati ya asilimia 10 na 30 ya mrabaha kutoka kwenye miradi yake mbalimbali.
- Makazi ya Mandela katika kijiji
alichokulia cha Qunu yatatumiwa na familia ya Mandela, na pia mjane
Graca na watoto zake wawili.
- Wajukuu kutoka katika ndoa yake ya
kwanza Evelyn Mase na ndoa ya pili kwa Winnie kila mmoja atapata Dola
za Marekani 9,000. Haikuwekwa wazi mara moja kama kuna chochote
kimerithishwa kwa Winnie.
- Wafanyakazi, akiwamo msaidizi wake binafsi wa muda mrefu Zelda la Grange, watapata Dola za Marekani 4,500 kila mmoja.
- Mashule na vyuo vikuu alivyosoma na kuweka sawa maisha yake ya kisiasa kila kimoja kilitunukiwa Dola za Marekani 9,000.
